Ипотека 2021. «7-20-25» бағдарламасында қандай өзгерістер бар?

Өздеріңіз білетіндей, елімізде ипотекалық бағдарламалардың саны аз емес. Олар жыл сайын құбылып өзгеріп тқрады. Жабылып жатқан, жаңадан ашылып жатқандары да бар. Енді осы бағдарламалардың бірі және ең негізгісі – 7-20-25 ипотекасы биылғы жылға қандай өзгеріспен кіріп отыр? Осы тақырыпты тереңірек қаузасақ.

«7-20-25» бағдарламасында қандай жаңашылдық бар?

Бағдарламаның ең үлкен жаңалығы – банк қатарының толығуы болды. Бұған дейін бағдарламамен 8 банк жұмыс істеп келсе, енді олардың саны тоғызға жетіп отыр. Банктер қатарына Altyn bank қосылып отыр. Нәтижесінде енді «7-20-25» бағдарламасы бойынша ипотекалық кредитті ЦентрКредит Банкі, АТФБанк, Jýsan bank, Bank RBK, Еуразиялық Банк, Халық Банкі, ForteBank, Сбербанк пен Altyn bank береді.

Сонымен қатар дәл осы банктер қолданыста болған үйлерді қамтитын Баспана Хит бағдарламасы бойынша да жұмыс істейді.

Бағдарламаның шарты қандай?

Өзіміз көріп отырғандықтай, бағдарламаның шарты атында тұр. 7 – бұл ипотекалық кредит бойынша жылдық пайыздық мөлшерлеме. Ол түпкілікті болып табылады және өзгермейді. Қарыз алушы азамат комиссияның барлық түрінен босатылған. 20 дегеніміз — бастапқы жарна. Бұл жерде қандай өзгеріс болды? Егер бағдарлама жұмыс істей бастаған 2018 жылы алғашқы жарна үй бағасының 20 процентін құрайды деп қатаң бекітілсе, енді соңғы жылдары 20% немесе одан да көбірек жарна құюға болады. Бұл азаматтар алдында туындап жүрген көптеген ыңғайсыздықтарды жойды. Ал 25 —  ипотекалық кредиттің жылдармен көрсетілген ең ұзақ мерзімі. Алайда, қарыз алушы ипотеканы өзіне ыңғайлы кез-келген мерзімге ала алады.

Үйдің шекті құнында жағымды өзгерістер бар. Қарағанды қаласы бойынша сатып алуға болатын үйдің шекті бағасы 15 миллион теңгеден 20 миллион теңгеге дейін өсті. Қарағандылықтар үшін бұл көптен күткен жаңалық еді. Себебі, Қарағанды қаласында көптеген үйлер 15 миллион теңгеден артық бағаға сатылып жатты да, бағдарламаға ілінбей қалды. Нәтижесінде, Нұр-Сұлтан, Алматы (қала маңындағы аймақтармен бірге), Ақтау, Атырау мен Шымкент қалаларында баспана бағасы 25 миллион теңгеден, Қарағанды қаласында 20 миллион теңгеден, ал басқа өңірлерде 15 миллион теңгеден аспауы керек.

«7-20-25» бағдарламасына кімдер қатыса алады?

Бағдарламаға Қазақстанның барлық азаматтары қатыса алады. Бастысы азаматтың атында үй болмауы және басқа ипотекасы болмауы тиіс. Сонымен бірге табыс ресми расталуы қажет. Егер сіз айлық алатын болсаңыз, онда ол бойынша зейнатақы қорына салымдар түсіп тұруы керек. Ал жеке кәсіпкер болсаңыз, онда банк сізден жылдық салық декларациясын талап етеді.